I WUMI NELLA

udem

I wumi Tamaziγt Tura ?

Tamaziγt tura d tasγunt tamaynut s tmaziγt n Usqamu Unnig n Timmuzγa. Tikti tusa-γ-d asmi d-nessufeγ kraḍ n wuṭṭunen n  Timmuzγa s tmaziγt.
Nwala amek tt-id-ssuturen yimeγriyen d umkan teṭṭef yakan di rreḥba n wayen d yetteffγen s tmaziγt.
Nenna-yas tamaziγt tuklal ad tesεu tasγunt i yiman-is.

I wakken kan ur nesseγlaḍ ara imeγriyen, ilaq ad ẓren belli  Timmuzγa yettwarun s tmaziγt d tefransist d taεrabt ad tkemmel amecwar-ines.
Tamaziγt tura d iswi i nella nessaram ad t-naweḍ acḥal aya, acku Asqamu Unnig n Timmuzγa d lwağeb fell-as ad yeqdec s tmaziγt i tmaziγt ! Akka i d-yewwi ad ddun lecγal.

Ihi hattan gar yifassen-nwen. D tasγunt-nwen. Nebγa-tt ad tili d annar i tira s tmaziγt i tmaziγt. d annar n usqerdec d tussna s tagi-nneγ. D annar anda
yal amedyaz, yal amyaru, yal amussnaw di tmaziγt, ama d tutlayt neγ d tasekla neγ d idles, ad yaf amkan-is.

Deg wuṭṭun-agi amezwaru, ma tebγam mačči d aneggaru, ad tafem tacemlit n yimagraden d-icudden γer yal aḥric n tmaziγt, abeεda tasekla d tesnelsit. Imi d tawwurt n useggas, yella yiwen uḍris yis-s i tebda tesγunt γef yennayer. Llant diγen aṭas n tullisin akked d tmedyazt d tsuqlin, mebla ma nettu tazrawt γef yismawen uddisen d kra n yiḍrisen nniḍen i d-yewwin γef waṭas n yisental am umezruy d wansayen n tmetti s umata.

Akka ihi, hattan γur-wen. Arut-aγ-d, acku tamaziγt, imira, teḥwağ kan ad tt-naru ad tt-nγer !

 

Agraw n tira

IMḌEBBER N TESΓUNT
Youcef MERAHI


AGRAW N TIRA
Hamid BILEK
Abdenour HADJ-SAID
Said CHEMAKH
Ramdane ABDENBI